ஒரு கவிஞனின் பொங்கல் விருந்து

சீர்மொழிகள்

அன்புள்ள மாந்தரே!
அறிவுள்ள சிறுவரே
இச்சிறு மொழிகள்
இவற்றைக் கேளீர்

நாட்டினைக் காக்க
நல்லன செய்க
பரிவுடன் நடந்து
பண்பினைக் காட்டுக

பண்புடன் வாழ்ந்து
பாராட்டுப் பெறு
உண்மையே உரைத்து
உலகினில் உயர்...!

விண்மீன்கள்

கண்ணைச் சிமிட்டும் விண்மீன்கள்
பொன்னைப் போன்ற ஒளிவண்ணம்

விண்ணில் சிரிக்கும் முல்லைகள்
விழுந்து விட்டால் விண்கற்கள்

இரவில் மலரும் விண்மலர்கள்
பகலில் மறைந்தே போய்விடும்

எண்ணி விட எண்ணிடின்
கண்ணா மூச்சி ஆடிடும்

மின்மினி போன்றே ஒளிதரும்
கண்ணின் மணிகள் விண்மீன்கள்

வானவில்

வண்ணங்கள் ஏழு
வானவில்லில் உண்டு
மழைக்கால மாலை
மணிவானில் தோன்றும்
தொடுவானில் துவங்கி
நடுவானில் நிற்கும்
கதிரவனின் எதிர்திசையில்
கவின்காட்சி அளிக்கும்
கண்களில் காட்சி
இயற்கையின் ஆட்சி

மின்னல்

மின்னல்....

பூவுலகப் புதுமைகளை,
படமெடுக்கும்
பரமனின்
கார்மேகக் காமிராவின்
'ஃபிளாஷ்' ஒளி

- வெற்றிவளவன்
-oOo-